Nekaj š čim se imamo štimati

Nekaj najlepšega mi je obločiti se v nošnjo.

Navek nase prvo oblečem gače, ali to so ne gače kakše mi denes imamo. To so kak kratke hlače, bele i skorom do kolen. Prije nego si oblečem bluzo nase denem zdulce šteri ima krotke rokove i pre šijako je zrezani tak kaj zgledi kak srčece. Nase posle obločim bluzu štera po sredini ima gombe, a rokovi so poštirkani pa zglediju bole na puf. Bluza nema duge rokove, negder do lakta so i tu pre krajo imaju nutri v rokovu trako kaj morem rokova lepo složiti kaj još bole na puf zgledi. Na noge si oblačim štomfe. Fest su velike, dojdejo mi do kolen i bele so. Na bele štomfe si obuvlem črne, kožnote cokle z malom peticom. Vežejo se š črnim žnoraj. Fest so lepe te cokle makar so starinske. Tak lepo zglediju na nogi. Zvežem ih dobro, kaj mi noga v jima ne pleše. Gori na gače vežem si spodnjice. Imam štiri spodnjice, dojdeju mi negder do litki na nogi. Mi mlajše i malo mršaveše imamo vejč spodnjici jer imamo menše bokove, a najbitneše je kaj nošnja pre bokovima lepo zgledi. Moje malo stareše pajdašice imajo meje spodnjici jer imajo malo vekše bokove. Dok sam se te spodnjice dobro zvezala kaj mi najo lezile, morem si na jih obleči rubačo. Ona je prozirna i fest tenka. Mora biti speglana na folde, kaj lepo zgledi. Prek nje lepo se vidijo spodnjice. Na bluzo si obločim prusljeka. Saka od nas ima drugačišega prusljeka. On je krotki, a moj na sebi ima žute i črlene cveteke.  Na krajo ima zašito još jedno trako na kojoj se vidiju črni cveteki. Ima gombe štere si onda zakapčim kaj lepo zgledi. Črni fortuf ide na rubačo, dugi je kak i rubača i veže se odzoj. Dok sam si i fortufa oblekla na bluzo ide tibet. Tibet je veliki robec šteri se slože v trokot. Pre šijako se nabere i koli se omota i odzoj se zveže. Bitno je kaj je na hrpto lepi mali trokot. Saki tibet na kraju ima štrancline šteri vesiju doli. Moj tibet je črleni z cvetekaj, makar more biti v vejč forbi. Tibet je tu kaj bode nam nošnja još lepše zgledala, kaj nabo sam črno bela. V zimi nas fest greje, a po leti si malo zamagodimo ako nam je vroče pa si ga posle slečemo. Dok sam se oblekla, na rokove si, pre krajo, zavežem črlene mašline. Dok sam vejč cela sprovlena još mi je sam frizura ostala za naprajti. Napre si losi lepo zaližem kaj mi bo razdelak na sredini, a odzoj si jedno kitico spletem. Na kitico isto ide jen črleni mašlin. Je ga vejč frizuri štere moći složiti. Najstareše žene imajo ropce na glovi, one ožejene imajo poculico, a mi najmlajše sam kitico ili punto.

Muški pak nase oblečeju bele gače štere so nutri v visokaj, črnaj, kožnotaj čižmaj. Gori na gačama je  svitnjek šteri drži gače kaj doli ne padnejo. Imajo belo robačo, ona se ne devle v gače nego lepo visi i na jo ide črni prusljek i on je otkapčeni. Na glovi imajo črnoga škrljoka.

Ima Međimorje vejč feli nošnji štere so išče kak lepe. Jo sam ve sam jano predstajla. Nošnja se nebre nositi nikak drugač nego s ponosom. Si mi šteri teh osem do dvanojst minot plešemo na bini v to smo vložili čuda svojega slobodnoga časa i još vejč svoje ljubafi. Mi nigdor nemo doli kaj se te lepi plesovi, popevke, a bormeš niti nošnja ne pozobijo. Naša nošnja nekaj je kaj nam nišči nigdor nabode mogel frasti i reči kaj je to jegovo. To so nam naše babice i japeki stavili. Mortik ta nošnja nekome nikaj ne poveda, no dok si malo pregruntamo moremo reči da so naši babice i japeki bili fest spametni. Z onoga kaj so doma našli naprajli so si obleko, no pak kaj je najbitneše meli so obleko štera je bila sam jihova. Pa ak sam Međimorje poglednemo moremo videti da je sako selo melo drugačišo obleko. A mi pak smo denes si jednoki. Baš zoto nesmimo pozobiti te naše popevke, plesove i nošnje. Ak se to pozobi kaj bomo onda meli? Ovak, dok to imamo, imamo se š čim štimati.

Tea Varga, 2.b

Gimnazija Josipa Slavenskog, Čakovec